《全民造星III》冠軍「折骨」Ben（趙祥誠）離開舊公司後沉寂一時，最近終有新搞作參加《第二屆Red Bull Dance your Style跳舞比賽》，望透過比賽令更多人認識折骨舞。Ben解釋雖已出道，但對跳舞熱情不減，決定今次再參賽。
「好多人或者屋企人會同我講，你跳舞咁激烈好易受傷，但我覺得趁仲後生試多啲，加上呢個比賽着重表演性，係我專長，唔係純粹Battle對戰，仲有同觀眾互動，做啲好炸嘅招，睇到其他國家開始搞時已好想參加，但之前撞咗其他嘢，今次終於參加到。」 參賽前Ben做了不少準備，除聽多些不同類型歌曲，無時無刻練舞亦不少得，「一有時間就會跳，甚至食飯、沖涼都會周身郁。」他又解釋比起練習，反而花更多時間度橋，「到時要即興，DJ打歌係唔同style，要諗點樣應付，反而要諗更多嘢。」